സാധാരണക്കാരൻ മാതായിയുടെ ഒരു ദിവസം

 സാധാരണക്കാരൻ മാതായിയുടെ ഒരു ദിവസം

ദിവസം തുടങ്ങുന്നത്

എപ്പോളെന്നു മാതായിക്ക്

അറിയില്ല.

ആറിനും പതിനൊന്നിനും

ഇടക്ക് പായയിൽ നിന്ന്

എണീക്കുമ്പോൾ ആയിരിക്കും അത്.

എങ്ങനെ ആണ് ജീവിക്കുന്നത്

എന്നും മാതായിക്കറിയില്ല.

ഉരുണ്ടും പിരണ്ടും ഇഴഞ്ഞും

പിണഞ്ഞും അലിഞ്ഞും

മറിഞ്ഞു തിരിഞ്ഞും

ഒരു കാക്കയെപ്പോലെയോ

ഒരു പന്നിയെപ്പോലെയോ

ഒരു ചാക്കട പോലെയോ

ഒക്കെ മാതായി ജീവിക്കുന്നു.

ആരൊക്കെയാണ് ഉള്ളത്

എന്ന് മാതായി ക്കറിയില്ല..

പെണ്ണിനെ പോലെയോ ആണിനെ

പോലെയോ കുഞ്ഞിനെ പോലെയോ

ഒക്കെ ഉള്ള ചിലർ ചിരിച്ചും തുപ്പിയും

കുത്തിയും മാന്തിയും ഒട്ടിയും

ഇടക്ക് കൂടെ കൂടുന്നു.

എങ്ങനെ ആണ് മരിച്ചതെന്നും

മാതായിക്കറിയില്ല.

വെടിയേറ്റോ അടിയേറ്റോ

വിശപ്പേറ്റൊ ചവുട്ടേറ്റോ

ഒക്കെ അത് ഉണ്ടായി.

ചുറ്റും ഉള്ള ആരെയും മാതായി

നോക്കാറില്ല..

അവർ കരുതുന്നത് അവർ

അസാധാരണർ ആണെന്നാണ്!

ഒരു പാരമ്പര്യ പുലയാടി

 ഒരു പാരമ്പര്യ പുലയാടി

അവര് പറഞ്ഞു

പുലയാടി എന്നത്

തെറി ആണെന്ന്.

അവര് പിന്നെ നീ

ഒരു സംസ്കാരം

ഇല്ലാത്തവൻ

ആണെന്നും

പറഞ്ഞു.

ഞാൻ ഞാൻ

അറിയാതെ പറഞ്ഞു

പോവുന്നു എന്നും

പറഞ്ഞു..

അവർ പക്ഷെ

അത് വിശ്വസിച്ചില്ല.

കുഞ്ഞു നാളിൽ ഒരു

ചെറിയ വീട്ടിൽ വച്ചു

ഒരു തടിച്ചു വെളുത്ത ഉമ്മ

മകനേ തൊട്ടിലാട്ടി

ഉറക്കുമ്പോൾ

എന്റെ പുലയാടി മോൻ

ഉറങ്ങുറങ്ങു എന്ന്

പാടുന്നത് കേട്ടു

ആസ്വദിച്ചു ഒരു കുട്ടി

കാലിലെ വിരലും നുണഞ്ഞു

കിടന്നിരുന്നത്

അവർക്കു അറിയില്ലല്ലോ....

ഡാ.. മൈ...

ഉമ്മ പിന്നേം....

പാട്

 പാട്

====

ചില പാട് അങ്ങട്ട് ഏൽക്കാണ്.

പാടല്ലേ ഉള്ളൂ എന്നും

സമാധാനം.

എന്താ ഒരു പാട്?

പാട് പാട് പെടുത്തി.

ഓ..

അതോ..

അതേ, പണ്ട്..

ഒന്ന് വീണതാ..

ഒരു വണ്ടി ഇടിച്ചതാ...

ഒരാൾ കുത്തിയതാ..

ഒരസുഖം വന്നതാ..

ഞാൻ പാടിനെക്കുറിച്ച്

മറന്നിട്ടു കാലം കൊറേ ആയി..

എന്നാലും അവർ മിത്രങ്ങൾ

സ്ഥലകാല ഭേദമില്ലാതെ

എന്നെക്കൊണ്ട് പാട്

പാടിപ്പിക്കുന്നു.

സൂർത്തെ...

ഇത് പുറമെ ഉള്ള പാട്

മാത്രം..

അകത്ത് ഇങ്ങള് അറിയാത്ത

എത്ര വലിയ പാടുകൾ..

ഹാ ഹാ ഹ...

കണക്കുകൾ

 ചില കണക്കുകൾ

പാടെ തെറ്റി.

എത്ര ആലോചിച്ചു

കൃത്യമാക്കിയവ

ആയിരുന്നവ.

എന്നിട്ടും.

വഴി ആകെ അടഞ്ഞു.

ഇത് വരെയുള്ള ജീവിതം

വമ്പൻ പരാജയം.

എന്നാൽ നാളെ രാവിലേ

മുതൽ ഇതിലൊന്നും

പെടാത്ത ഒരു പുതിയ

കണക്ക്‌ 

തുടങ്ങുക തന്നെ.

പ്രദീപ് പട്ടാമ്പി 11.4.23

ചോദ്യോത്തരം

 ചില ചോദ്യങ്ങൾ ഉണ്ട്.

ദൈവത്തോട് ചോദിക്കാനായി വച്ചവ.

ചില ചോദ്യങ്ങൾ ഉണ്ട്.

പല മനുഷ്യരോടും ആയി

ചോദിക്കാൻ വച്ചവ

അതിന്റെഒന്നും ഉത്തരം കിട്ടാതെ

എങ്ങിനെയോ ജീവിച്ചു

പോരുമ്പോൾ ചിലർ

ചില ചോദ്യങ്ങൾ ചോദിക്കുന്നു.

എത്ര ഉത്തരം പറിഞ്ഞാലും

അവർ അത് അംഗീകരിക്കുകയുമില്ല 

ചോദ്യം പരീക്ഷ സമയത്തെ

ചോദ്യക്കടലാസ്സിൽ മാത്രം

ഒതുങ്ങുന്ന ഒന്ന്.

ദൈനദിന ജീവിതവുമായി

ഒരു ബന്ധവുമില്ലാത്തത്.

എന്തേ ഇങ്ങനെ?

എന്തുകൊണ്ടങ്ങനെ?

എന്ത് കൊണ്ട് രോഗം?

മനുഷ്യർ തുല്യരല്ലേ?

എന്ത് കൊണ്ട് ക്രൂരത?

എന്തിന് യുദ്ധം?

എത്ര ഗ്രഹങ്ങൾ?

എത്ര നക്ഷത്രം?

എവിടെ പണം?

എവിടെ സുഖം?

എത്ര ദൈവം?

....................................

............................

.......

പ്രദീപ് പട്ടാമ്പി 11.4.23

ചിത്രകാരന്റെ വീട്

 ചിത്രകാരന്റെ വീട്

ഒരു അരുവിക്കരയിലാണ്.

അതിനാൽ തന്നെ ചിത്രകാരന്റെ

വീട്ടിൽ പലയിടത്തു നിന്നും

ജലം ഒഴുകുന്നു 

കാക്കയും കുയിലും

പ്രാവും പട്ടിയും ചിത്രകാരന്റെ

വീട്ടിനുള്ളിൽ കഴിയുന്നു.

പുറത്തെ ഒരു മല

അവസാനിക്കുന്നത്

വീടിന്റെ അപ്പുറത്താണ്.

സൂര്യൻ ഉദിക്കുന്നത്

വീടിന്റെ പൂമുഖത്തു

ചന്ദ്രൻ കിടപ്പു മുറിയിൽ.

പുരക്ക്‌ ആകാശമകലം

താഴെ മൺ നിറം.

വീട്ടിലെ ഒരു ഭാഗത്തു നിന്ന്

അടുത്ത ഭാഗത്തേക്ക്‌ പറക്കാം.

നടക്കാം, ഒഴുകാം..

എല്ലാ കായും കിട്ടുന്ന ഒരു

മരത്തിന്നരുകേ, എല്ലാ പൂവും

നിറഞ്ഞ ഒരു ചെടി.

പല വർണ്ണ ഫലങ്ങൾ നിറഞ്ഞ

തീൻ മേശ..

വീടു വരച്ചിട്ടുള്ളത് ഒരു വലിയ

മതിലിൽ ആണ്.

ചിത്രകാരൻ ഉറങ്ങുന്നത്

 അതിന്നരികെ

വിരിച്ച ഒരു പായയിലും.

പായയിൽ കുറച്ചു നാണയങ്ങൾ....

ഒരു ചെങ്കല്ല്....

പ്രദീപ്,പട്ടാമ്പി 11.4.23

ചീർപ്പ്

ചീർപ്പ്

==============

ചീർപ്പുമായുള്ള ബന്ധം

കുറയുന്നു.

പത്തു വർഷം മുമ്പേ

മൈസൂരിൽ നിന്നും

വാങ്ങിയ പൌഡർ ഡപ്പയിൽ 

ഇപ്പളും പൌഡർ ബാക്കി.

ഒരോ കാരണങ്ങളലാൽ

വെട്ടുവാൻ മറന്ന താടിയും മുടിയും.

ചെറുപ്പത്തിലേ മരിക്കാൻ

തീരുമാനിച്ച പോലെ..

എന്നാൽ ചീർപ്പു ഇപ്പോളും

 അച്ഛനെ

 ഉറ്റു നോക്കി ഇരിക്കാറുണ്ട്.

തൊണ്ണൂറാം വയസ്സിലും

കഷണ്ടി തലയിൽ ബാക്കി വന്ന

വെളുത്ത മുടി ദിവസേന മൂന്ന്

നേരമെങ്കിലും കണ്ണാടിയും നോക്കി

ചീകുന്ന സൗന്ദര്യ ബോധം ഉള്ള

അച്ഛനെയാണ് അതിന്നിഷ്ടം.

ചീർപ്പ് റൂമിലെ വോക്കിങ് സ്റ്റിക്കിനും

ഈസി ചെയറിനും വെള്ള ഷർട്ടുകൾക്കും

കണ്ണടക്കും വാച്ചിന്നും

 പേഴ്സിന്നും അമ്മയ്ക്കും

ഒപ്പം എപ്പോളും

ഉന്മേഷവാനായ

അച്ഛനെയും കാത്തു നിൽപ്പാണ്...

അച്ഛൻ വയസ്സ് 

അറിയുവാൻ ഒരുക്കമല്ലായിരുന്നല്ലോ!

ജീവിതത്തെ ഇഷ്ടമുള്ളവരാണ്

കൂടുതൽ കാലം ജീവിക്കുന്നത്

എന്ന് ചീർപ്പ് - എന്നോട്.

ആത്‍മഹത്യക്കാരി

 ആത്മഹത്യാക്കാരി 

====================

അവൾ അങ്ങനെ എല്ലാരും

പറേണകൂട്ട് പലതും പറഞ്ഞു.

അവളുടെ കൂട്ടുകാരെ പറ്റി

അവളുടെ രാഷ്ട്രീയത്തെ പറ്റി

അവളുടെ പ്രായത്തെ പറ്റി

അവൾ അവിവാഹിത ആയത്

അവളുടെ ചേച്ചിയുടെ മക്കൾ

മീൻപിടുത്തക്കാരനായ അപ്പൻ

ബൈക്കിൽ കൊണ്ട് പോകുന്ന അണ്ണൻ

പലരും പല തവണ പറഞ്ഞു കേട്ടതിനാൽ

ആവേണം അതോന്നും ഓർമ്മയിൽ ഇല്ല.

എന്നാൽ ഒരിക്കൽ അവൾ പതിയേ

പലപ്പോളും ആത്മഹതൃചെയ്യാൻ

തോന്നാറുണ്ട് എന്ന് പറഞ്ഞു

ലളിതമായി ചിരിച്ചു.

ആ വരി മാത്രം ഇന്നും അവളായി

ഇടയ്ക്കു ഓർമ്മയിലേക്ക് തികട്ടി

വരുന്നു.

ഇന്ന് അവൾ എവിടെ ആണ്?

അവൾ ആത്മഹത്യ ഒരിക്കലും

ചെയ്യില്ല.

 അവൾ തന്നെ ഒരാത്മഹത്യയാണ്.

എന്നാലും ഇപ്പോൾ അവൾ.....?

ആ കറുത്തു മെലിഞ്ഞ

ജീൻസുകാരി.......

മന്ദാകിനിയുമൊത്തു ഒരു ബോട്ട് യാത്ര

 മന്ദാകിനിയുമൊത്തു

ഒരു ബോട്ട് യാത്ര

==================

ബോട്ട് പുറപ്പെടുമ്പോൾ

ഞങ്ങൾ രണ്ട് അപരിചിതാരേ

പ്പോലെ അടുത്തിരുന്നു.

അവൾ നീന്താൻ അറിയാത്തവളെ

പ്പോലെ കണ്ണാഴം കൊണ്ട്

കായലാഴം അളക്കുന്നതും

കണ്ടു അരികിലേ കടൽ

ചിരിച്ചു.

ബോട്ടിനെ ഉരുമ്മി അങ്ങോട്ടും

ഇങ്ങോട്ടും ബോട്ടുകൾ ഒഴുകി നീങ്ങുന്നു.

കൈ വീശി കാട്ടിയ മദാമ്മക്ക്‌ 

മറുപടി നൽകി.

അരികെസായിപ്പന്മാർ

ചുവന്ന ഗ്ലാസുമായി ആകാശവും

കായലും കൂട്ടി മുട്ടുന്നത് അളക്കുന്നു.

ബോട്ടിലെ നാടൻ പാട്ടുകാരിയുടെ

കൈയ്യടി പാട്ട് കേട്ടു ഒരു കായൽ

പക്ഷി ബോട്ടിന്നടുത്തു നിന്ന്

എങ്ങോട്ടോ പറന്നകന്നു.

ബോട്ടിലുള്ളവർ മീൻ വറുത്തതും

എരിവും പുളിയും ഉള്ള കറിയും

ചിക്കനും കൂട്ടി ചോറ് കഴിക്കുമ്പോൾ

ഞാൻ മന്ദാകിനിക്കായി തിരഞ്ഞു.

അവൾ മന്ദാകിനി എവിടെയാണ്??

അരികിലായി അവളുടെ ബാഗ് മാത്രം

കാണുന്നു.

രാത്രി വരെ തിരഞ്ഞിട്ടും അവളെ

കിട്ടിയിട്ടില്ല!.

അവൾ എന്നോടൊത്തു കൂടെ

ബോട്ടിൽ കയറിയിരുന്നു എന്ന് തീർച്ച.

അവൾ എന്നോട് കൂടെ ഇറങ്ങിയിട്ടില്ല

എന്നതും തീർച്ച.

കായൽ കഥ പറയും എന്ന് ആരോ

പറഞ്ഞു കേട്ടിട്ടുണ്ട്.

കറുത്ത കായലിനു ഇക്കഥ 

എങ്ങനെ അറയാനാണ്?