ബാക്കി

 X ബാക്കി

==========

ശരിക്കും മരിച്ചപ്പോൾ

കുറച്ചു ശരീരം ഭാഗം

കേട് വരാത്തതായി

ഉണ്ടായിരുന്നു.

കൈ കാലിലെ കുറച്ചു

എല്ലുകൾ.

ഹൃദയം, ശ്വാസ കോശം,

വയറ്, ലിംഗം അങ്ങനെ

ചിലത്.

തല തകർന്നു ചത്തതോടെ

ബാക്കിയായ ആ നല്ല ഭാഗങ്ങളും

വെറുതേ ചത്ത്.

യക്ഷി

 യക്ഷി

=========

യക്ഷിയൊക്കെ ഇവിടെ

ഉണ്ടെന്നാണ് പഴങ്കഥ..

അവൾ എന്നോട്.....

ഇപ്പോളത്തെ കാലത്ത്

എന്ത് യക്ഷി?

ഞാൻ അവളോട്.....

ശുഭദിനം

ശുഭ ദിനം

=========

ചോദ്യം കേൾക്കാതെ

തന്നെ പേര് പറയുമ്പോലൊരു 

മാർക്കറ്റിംഗ് തന്ത്രമായി

ശുഭദിനം പതിക്കൽ.

അശുഭത്തിൽ നിന്ന് 'അ '

മുറിക്കനാകാതെ ഒരശു.

കാക്ക കരയുന്നത്രെ

ഷാപ്പ് നിറയുന്നത്രെ

ഭൂമി തിരിയുന്നത്രെ

ശുഭ ദിനം ഒരു

പ്രതീക്ഷിപ്പിക്കലത്രെ

എന്റെ പേര് ഇങ്ങള്

വായിക്കുമ്പോൾ

നിക്ക് അത് ഒരു പ്രതീക്ഷ.

ശുഭദിനവും സായിപ്പിന്റെ

പഴേ ശർദ്ധി.

ആദ്യമായി കള്ള് മോന്തുമ്പോൾ

ആദ്യമായി പെണ്ണിന് പള്ളേല്

ആകുമ്പോൾ ഉണ്ടാകുംപോലുള്ള 

ഒഴിവാക്കാൻ ആകാത്തൊര

ശർദ്ധി ദീനം 'ശുഭ ദിനം.'

ഉമ്മറത്തു ഒരു പട്ടി കുരക്കുന്നു.

പോടാ പട്ടീ.. എനാർക്കുന്നതിന്നും

പകരമായി.. പട്ടി നിനക്കും

ശുഭദിനം...

നിന്റെ കുര അങ്ങനെ വാനിൽ

നിറഞ്ഞ് നിറഞ്ഞു നിനക്ക്

ഒരായിരം ആരാധകരുണ്ടാകട്ടെ

അവരിൽ ഉണ്ടാകും

കുട്ടി പട്ടികളിൽ ഒന്നെങ്കിലും.

ഒരു നക്സൽ ആകട്ടെ..

അവൻ പേ പിടിച്ചു അലഞ്ഞു

പഞ്ചായത്താപ്പീസിൽ പണി

ഇല്ലാതെ ശുഭദിനം ഞെക്കി

താലോലിക്കുന്ന പട്ടി പിടുത്ത

ക്കാരനെ ഈ ലോകം

മുഴുവൻ ഓട്ടട്ടെ..

അയ്യാ.. വല്ലതും കൊടുങ്കാ..

എന്നും പറഞ്ഞു ഒരു 

പിച്ച ക്കാരൻ,

ഓന്റെ മൊബൈലിൽ

Gpay മട്ടിൽ എന്റെ മറ്റൊരു

ശുഭ ദിനം..

അ വൻ എങ്ങോട്ട് മണ്ടി?

എല്ലാ ദിനോം ശുഭദിനമെന്നു

ഒരു സൈക്കോളജിസ്റ്റ്.

അങ്ങനെങ്കിൽ അനക്കും

രാട്രീയക്കാർക്കും പണീം

തോരോം ണ്ടാവില്ലെന്നു പയ്യൻ.

(ഗഞ്ചൻ.)

ഇതുവരെ കാണാത്ത

ഒരു ശുഭദിനം മോഡൽ

ചിരിയുമായി കവി.

അ ശുഭം എന്നെഴുതിഎഴുതി

കറുപ്പിച്ച ഒരു വെള്ളപ്പേപ്പറിന്റെ

മറുപുറം പോലെ ശുഭദിനമെന്നു

ഒരു സാഹിത്യ പോക്കിരി.

(അവന്റെ നാട്ടിലെ കുമാരനാ 

ആശാൻ )

ചൂലിന്റെ കച്ചോടം കുറഞ്ഞു

ചെരുപ്പിന്റെ കച്ചോടം കൂടി

-അന്തി ചർച്ച.(താഴെ ശുഭദിനം )

ഡോളറും പൈസയും

തുല്യമാകുമ്പോൾ

ശുഭദിനം.

പാടത്തെ പന്തുകളി

 പാടത്തെ പന്ത് കളി

=================

പാടത്തെ പന്ത് കളി

കാണാൻ ആളില്ല.

എല്ലാരും കളിക്കാർ.

പാടത്തെ പന്ത് കളിക്ക്

റഫറി ഇല്ല.

റഫറി മഹാനായ ദൈവം.

പാടത്തെ പന്ത് കളിക്ക്

സമയം ഇല്ല.

ഒന്നുകിൽ രാവിലെ മുതൽ

ഉച്ചവരെ വരെ.

അല്ലെങ്കിൽ ഉച്ച മുതൽ

രാത്രി വരെ.

നിലാവുള്ള രാത്രികളിൽ

കളി നിൽക്കില്ല.

ഒരു വിശപ്പിനും

അടുത്ത വിശപ്പിനും ഇടക്ക്

അത് നടക്കുന്നു.

പാടത്തെ പന്ത് കളിക്കാർക്ക്

പരിക്ക് പറ്റാറില്ല.

-പറ്റിയാൽ അവർ

അതറിയാറില്ല.

പാടത്തെ പന്ത് കളിക്കാർ

ഇടക്ക് ചവിട്ടാറുണ്ട്, മാന്താറുണ്ട്.

തല്ലാറുണ്ട്, തെറി പറയാറുണ്ട്.

നോട്ടം മുഴുവനും പന്തിൽ

ആയാതിനാൽ പാടത്തെ

പന്ത് കളിക്കാർ

അത് കാര്യമാക്കാറില്ല.

പാടത്തെ പന്തിലെ തുന്നിയ

ഭാഗങ്ങളിൽ നിന്ന് ഇടക്ക്

ബ്ലേഡ്ഡർ തുറിച്ചു നിൽക്കാറുണ്ട്.

- അപ്പോൾ കളിക്കാർ പന്ത്

വീണ്ടും തുന്നിക്കൂട്ടാൻ

ശ്രമിക്കുന്നു.

പാടത്തെ പന്ത് ചെന്ന് വീഴുന്ന

 പോസ്റ്റിനെ

സ്വർഗ്ഗം എന്നാണ് പറയാറ്.

ആകാശം മുഴുക്കെയായി 

സ്വർഗ്ഗം

പരന്നു കിടക്കുന്നു.

പാടത്തിൽ ഇടക്കായി

കിണറോ തെങ്ങോ കന്നു

കലികളോ ഉണ്ടാകാറുണ്ട്.

പാടത്തെ പന്തുകളിയിൽ

അവയും പങ്കെടുക്കുന്നു.

പാടത്തെ പന്ത് കളി

ഒരവേശമാണ്.

-പിന്നീട് എവിടെ നിന്നും

കിട്ടാൻ ഇടയില്ലാത്ത

മതിയാവോളം കളിച്ചു

തീർക്കേണ്ട ഒരാവേശമായി

പാടത്തെ കളി തുടരുന്നു.

മകൾ

 മകൾ 

=============

കീറിയ കടലാസ്സിൽ

മുറിപ്പെൻസിൽ കൊണ്ട്

കുട്ടിക്കാലത്തവൾ 

 ഒരു ചിത്രം വരച്ചു.

ഒരു വലിയ പൂവും 

അതിന്റെ ഞെട്ടിയും.

വർഷങ്ങൾക്കിപ്പുറം

ഒരു കസേരയിൽ

 ചരിഞ്ഞിരുന്നു

അവളെ 

ഓർക്കുമ്പോൾ

ആ കടലാസ് പൂവിനു

നിറവും മണവും

ചാഞ്ചാട്ടവും!.

കൂട്ടുകാരനും കൂട്ടുകാരിയും

 കൂട്ടുകാരനും കൂട്ടുകാരിയും 

=======

കൂട്ടുകാരി മാറുന്നുണ്ട്..

റിബ്ബെണിൽ നിന്നും

ഡൈയിലേക്കും

മകളിൽ നിന്നും

ഭാര്യയിലേക്കും

അമ്മയിലേക്കും

ആയി കൂട്ടുകാരി

മാറുന്നുണ്ട്.

കൂട്ടുകാരൻ മാറുന്നുണ്ട്.

സൈക്കിളിൽ നിന്നും

കാറിലേക്കും

നാരങ്ങ വെള്ളത്തിൽ നിന്നും

ബ്രാണ്ടിയിലേക്കും ആയി

കൂട്ടുകാരൻ മാറുന്നുണ്ട്.

കൂട്ടുകാരനും കൂട്ടുകാരിയും

വല്ലപ്പോളും ആയി അടുത്തടുത്തു

കൂടെ സഞ്ചരിക്കാറുണ്ട്.

അപ്പോൾ പരസ്പരം

അറിയാതിരിക്കാൻ

ഇരുവരും ആത്മാർത്ഥമായി 

പരിശ്രമിക്കുന്നു.

ചിത

 ചിത

=======

നീ എന്നെ അറിയില്ല 

എന്റെ ദുഃഖങ്ങളെ

എതിർ നീന്തലുകളെ

വേദനകളെ സത്യങ്ങളെ

എന്റെ ഒറ്റയാകലിനെ

എന്നേ വീഴ്ത്തിയ ചതിക്കുഴികളെ

എന്റെ നിസ്സീമ സ്നേഹത്തെ

എന്റെ ചവിട്ടടികളെ

എന്റെ ഇടവഴി യാത്രകളെ

എന്റെ നെടുവീർപ്പുകളെ

എന്റെ സാധ്യതകളെ

എന്നോടൊപ്പം വളർന്ന പൂക്കളെ

തളർന്ന ആശയങ്ങളെ

തകർന്ന ജീവിതത്തെ

നീ അറിയില്ല, ലോകമേ..

ഒരിക്കലും..

നിനക്കതിനു കഴിയില്ല!

എന്നിട്ടും...

ഞാൻ നിന്നെ ശ്രദ്ധിക്കുന്നു

ചിന്തിക്കുന്നു

നിന്നിൽ ഞാൻ അവശേഷിക്കുന്നില്ലെന്നറിഞ്ഞിട്ടും

 ഞാൻ എന്ന അപരിചിതൻ

നിന്നെ സ്നേഹിക്കുന്നു.

നീ പകർന്നകന്നു വേറെ 

പോകുമ്പോൾ പോലും...

ഞാൻ എറിഞ്ഞമർന്നു

അവസാന കനലായി 

ഒടുങ്ങുമ്പോൾ പോലും..