നാരങ്ങ മിട്ടായി

 നാരങ്ങാ മിട്ടായി*

===========

(പിഞ്ചു കുഞ്ഞിന്റെ അമ്മയോടൊത്തു ജീവിക്കാനുള്ള അവകാശം നിഷേധിച്ചു കുഞ്ഞിനെ വീട്ടിലാക്കി ജോലിക്ക് പോകുന്ന അമ്മമാർക്കു എതിരെ ഉള്ള ഒരു കുഞ്ഞിന്റെ പ്രതിഷേധമാണ് ഈ കവിത )

മിട്ടായി അച്ഛാ,മിട്ടായി

നാരങ്ങാ മിട്ടായിയച്ഛാ

നാരങ്ങാ മിട്ടായി..

അമ്മ ജോലിക്കായി

 പോയതിന്നെതിരേക്കും

 നോക്കി

ആർത്തു കരഞ്ഞവൾ

അലറികരഞ്ഞവൾ

അമർത്തികരഞ്ഞവൾ

ചുണ്ട് പുളുത്തി കരഞ്ഞവൾ

ചവുട്ടി കരഞ്ഞവൾ

മാന്തി കരഞ്ഞവൾ

ചൂണ്ടികരഞ്ഞവൾ

കണ്ണും നിറച്ച് കണ്ണീർ നിറച്ച്

കരഞ്ഞവൾ...

മുക്കിലെ ഷോപ്പിലെ

നെല്ലിക്ക വേണ്ട

ഓറഞ്ചു മിട്ടായിയും

വേണ്ട, ബലൂൺ വേണ്ട

വേണ്ടാ പാരീസ്, ജീരകം

വേണ്ട പോപ്പിൻസു വിക്സ്

നാരങ്ങാ മിട്ടായി മാത്രം അച്ഛാ..

നാരങ്ങാ മിട്ടായി മാത്രം...

അമ്മ ജോലിക്കായി പോയയങ്ങോട്ട് 

നോക്കാതെ കരഞ്ഞു പറഞ്ഞവൾ.

കുറച്ചേറേ കരഞ്ഞു കരച്ചിൽ

നിറുത്തിയവൾ,മിട്ടായിക്കാര്യം

പാടെ മറന്ന് 

അമ്മ ഓട്ടോയിൽ കയറി

പ്പോയൊരാ വഴിയറ്റം നോക്കി

വൈകീട്ട് എത്തുന്നോരമ്മയെ

പാർത്തു 

അനങ്ങാതിരുപ്പായി.....

(*മിഠായിക്ക് മിട്ടായി എന്ന് എഴുതിയിരിക്കുന്നു.)