പുഴ ദൂരം

പുഴ ദൂരം

പണ്ട് ആതിരാനിലാവത്തു

പുലർച്ചെക്കും   പെണ്ണുങ്ങൾ

 മാത്രമായികുളിക്കാനായി പോകും

ഭാരതപ്പുഴയിലേക്കിന്നു

ഇറങ്ങാനുള്ളൊരു വഴിയും

തിരഞ്ഞരയിൽ തോർത്തും

മടക്കി തിരുകിയലഞ്ഞു

ഞാനൊരു പാട് കോൺക്രീറ്റു

മതിലുകൾക്ക് ഇടയിലായ്

എവിടേയോ - പുഴ



വഴിയിൽ കണ്ണിൽ ബലമുള്ളൊരു

ബംഗാളി പെണ്ണിനെ കണ്ടവളുടെ

ഇടത് തോളിലൊരു ഭാണ്ഡമതിലൊരു

പെൺ കുഞ്ഞു സുഖമായി ഉറങ്ങുന്നു ,

വലതുതോളിൽ കോലിൽ കെട്ടിയൊരായിരം

നിറ ബലൂണുകൾ ,നീട്ടി ചീകിയ

തലമുടിയവൾക്കതിന്നോരത്തു

നിന്ന് ഇറ്റൊരു തുള്ളി വെള്ളം താഴെ

വീണുരുണ്ടു മണ്ണിൽ ലയിച്ചു

അതെൻ  പുഴ

ചൂളം  കുത്തി പായും വണ്ടിക്കും

ചരിഞ്ഞുലയും ബസ്സിനും

നാറും വഴിയിലലയും നായ്ക്കും

മനുഷ്യനും ഇടക്ക് നഷ്ടപ്പെടേണ്ട

ദൈവ ബോധമായി   -പുഴ




മഞ്ഞൾ  മുഖവും

തൂക്കു പാത്രവും മൊബൈൽ

ഈണവുമായി കൂട്ടമായി

പണിക്കെത്തും തമിഴ് പെണ്ണിൻ

ചൊല്ലിൻ ഉന്മേഷത്തിൽ മറഞ്ഞിരിക്കും

വേദനയായി -പുഴ



മണ്ണിലലിഞ്ഞൊ എരിഞ്ഞോ

എത്തേണ്ടൊരെൻ ജഡ കണം

ഒഴുകി അകലം പുഴയിലെ ഓരത്തെ

ചെറുമരം ചാഞ്ചാടും ഈണം

പാടിത്തളർന്നു അലിഞ്ഞിന്നേ

ഇല്ലാണ്ടായോ - പുഴ ..