ബസ്സ്

 ബസ്സ്

റോട്ടിലെ ഒരു പാട് അവകാശ

സമര പ്രകടന ങ്ങൾക്കിടക്കുപെട്ടു 

സമയം തെറ്റി ഓടുന്ന ഒരു ബസ്സു 

സമയംശരിയാക്കാൻ

 റോട്ടിലൂടെ ആഞ്ഞു

പാറുന്നു.

ബസ്സിനകത്തു ജോലി ചെയ്തു

തളർന്ന അന്യ സംസ്ഥാന തൊഴിലാളികൾ.

.സർക്കാർ ആശുപത്രിയിലേക്ക്

 രോഗിയായ മകളെയും

കൊണ്ട് പോകുന്ന

ഒരു വീട്ടമ്മ

നാലു വിദ്യാർഥിനികൾ

രണ്ടു വൃദ്ധർ.

ബസ്സിന്‌ പുറത്തു

റോട്ടിൽ ചെറുതും വലുതും

ആയ കുറെ വാഹനങ്ങൾ.

ഇവരിൽ ആരുടെ

അവകാശം കാക്കാനാണ്

ബസ്സ് ഇങ്ങനെ വായുവിലൂടെ

പറക്കുന്നത്?

ആരുടെ സമയം അടുപ്പിക്കാനാണ്

ബസ്സ് ഡ്രൈവർ ഇങ്ങനെ

ഇടം വലം നോക്കാതെ

ബസ്സിനെ കുതിച്ചു

ചാടിപ്പിക്കുന്നത്?

ഹൽവയും തീറ്റയും

 ഹൽവയും തീറ്റയും 

------------------------------------------

ഹൽവയും തീറ്റയും 

രണ്ടു കവിതകളാണ്.

രണ്ടും ഒപ്പം എഴുതുന്നത് 

ഒരു പരീക്ഷണമോ ,

മപ്പത്തരമോ അതോ 

ഗതികേടോ ആണ് !

ഹൽവ ഉള്ളത് 

കോഴിക്കോട്ടെ മിഠായി 

തെരുവിൽ ആണ് ...

തീറ്റയാകട്ടെ പത്താംക്ലാസിലെ 

ത്രികോണമിതിയിലും ....

മധുരവും രുചിയും 

വേണ്ടൊളമുള്ള,

പല നിറങ്ങളിലുള്ള  

ഹൽവ തിന്നാനാകാഞ്ഞത് -

ഒരിക്കലും വാങ്ങാനാകാഞ്ഞത് [

വേറൊന്നും കൊണ്ടല്ല -

സ്നേഹമുള്ള ആളുകൾക്കെല്ലാം 

ഒരു കഷ്ണമെങ്കിലും കൊടുക്കാതെ 

എങ്ങനെ ഒറ്റയ്ക്ക് തിന്നും എന്ന 

ചിന്ത കൊണ്ടുമാത്രം ..

എന്നാൽ തീറ്റയാകട്ടെ 

സൈനിനോടും കോസിനോടും 

ടാനിനോടും കോട്ടിനോടും 

സീക്കിനോടും കൊസീക്കിനോടും 

ഒപ്പം ഒരാറേഴു \കൊല്ലം 

വിടാതെ പിന്തുടർന്നു 

തീറ്റകൊണ്ട്‌ വേറൊരു 

ഗുണവും പിന്നീട് കിട്ടിയുമില്ല 

കാലിത്തീറ്റയോ കോഴിത്തീറ്റയോ 

പോലും അല്ലല്ലോ 

അല്പം ഗുണമെങ്കിലും 

കിട്ടാൻ..-

തീറ്റ മുടക്കിയ തീറ്റക്കവിതകൾ 

അങ്ങനെ ഒന്നായി .

സുഫൈജയോട് ...

 സുഫൈജയോട് ...

======================================

സുഫൈജ - സ്ഥിരമായ സ്നേഹം

ഒരു വലിയ നുണ! .

തലച്ചോറിൽ നീ കൂട്ടിയ മാറാല മാറും

വരെ മാത്രം, ഞാനും നീയും .

നിൻടെ മാറാലക്കച്ചവടത്തിനിടക്ക്

ഞാൻ എന്ന എട്ടുകാലി (പ്പണി )

സുഫൈജ .-നിൻടെ മരണം

എൻടെ ആഗ്രഹം

ഒരു ചെറിയ ഓർമ്മ മാത്രമായി

അത് എന്നെ വന്നു മുട്ടിത്തലോടുമ്പോൾ

സുഫൈജ .-ഞാൻ - ഞാൻ

ആകാതെ പിന്നെ ?

സുഫൈജ നമ്മൾ ഇരുട്ടാണ്

കൂരിരുട്ടിൻടെ കരിങ്കട്ട കൂട്ടങ്ങൾ

വെളിച്ചം പക്ഷെ, സ്വപ്നം .

സുഫൈജ -എന്നെ തിരഞ്ഞു

ഞാൻ പോകുന്നു

എന്ന നിൻടെ കരുതൽ തെറ്റാണ്

കുറച്ചു ജലത്തിലും ഖരത്തിലും

ഞാൻ ഉണ്ട് എന്ന ധാരണയും

സുഫൈജ ,,-

തെറ്റിദ്ധാരണയുടെ ആകെത്തുക

ആണ് എല്ലാ പ്രണയവും എന്ന്

ആരും എഴുതി വക്കാഞ്ഞത്

കരുതിക്കൂട്ടി ത്തന്നെയാണ് .

പക്ഷെ , സുഫൈജ -

നമ്മുട നാട്ടിലെ പൊട്ടക്കുളത്തിന്നരികിലെ

ഇടിഞ്ഞു പൊളിഞ്ഞ മതിലോരത്തു

കരിങ്കൽ കഷ്ണത്താൽ ഞാൻ

കോറിക്കൊത്തിയ അക്ഷരങ്ങൾ -

പച്ച മൂടി കറുത്തതു-

ഒരു ചെറിയ സത്യം തന്നെ !

ആ കുളത്തിലെ ചെളിച്ചെടികൾക്കിടയിൽ

വിടർന്നോ കൂമ്പിയോ നിൽക്കും ആമ്പലും -

സത്യം .

സുഫൈജ ,-സത്യം പറയാനുള്ള

എൻടെ കഴിവ് ഒരു ബലഹീനതയാണ്

-നീ കരുതന്നതോ അത് ഒരു ധീരതയായും

സുഫൈജ ..-

ഭാവിയിൽ നീ എന്നെ തിരിച്ചറിയാതെ

പോകരുത്

തിരിച്ചറിയുന്നപോലെ ഇനിയെങ്കിലും

അഭി നയിച്ചു തുടങ്ങുക .

സുഫൈജ,,- പ്രണയം ഒരു വലിയ

പരാജയം ആകുമെന്ന് നമ്മൾ

പണ്ടേ തിരിച്ചറിഞ്ഞവർ

സുഫൈജ -നമ്മൾ അതി ശക്തർ...

കൂയ്

 കൂയ്

====================...

കോഴി കൂവും പോലെയോ

മഴ ചാറ്റും പോലെയോ

കടൽ ഇരമ്പൽ പോലെയോ

അല്ല കൂവൽ എന്ന് കോയ

അറിഞ്ഞത് സ്കൂളിൽ

അംബുജം ടീച്ചറുടെ ക്ലാസ്സിൽ

വച്ച് അറിയാതെ ഉറക്കെ

കൂയ് എന്ന് കൂകിയപ്പോൾ

ആണ് .

ബാപ്പ ഹൈദ്രു ആണ്

കോയയെ കൂവൽ പഠിപ്പിച്ചത്

ബാപ്പ മീൻകൊട്ടയും താങ്ങി

സൈക്കിളിൽ രാവിലെ

ഇറങ്ങുമ്പോളാണ്

കോയക്കാതിലേക്ക്

കൂയ് കൂയ് കൂവൽ

എത്തിയത് .

പിന്നെ രാവിലെ

കൊളത്തിലെ ചാടിക്കുളി

കയിഞ്ഞു മടങ്ങുമ്പോളാണ്

ഹൈദ്രു

മലകൾക്കും പാടങ്ങൾക്കും

മരങ്ങൾക്കും ഇടയിലെ

ഒരു ചെമ്മൺ പാതയോരത്തു

നിന്ന് കോയയോട് കൂയ് -

എന്ന് കൂക്കാൻ പറഞ്ഞത്

കൂയ് കൂയ് കോയ ഒരു

പ്രാവശ്യം കൂകിയപ്പോൾ

ആകാശത്തുനിന്നും കൂയ്

കൂയ് എന്നു തിരിച്ചു

ആരോ മൂന്നു പ്രാവശ്യം

കൂക്കിയത്രേ ..

അത് കേട്ടിട്ടാകണം

പാടത്തെ രണ്ടു മൂന്നു

മയിലുകൾ കനം

തൂങ്ങി അപ്പുറത്തെ

മതിലിലേക്കു

പറന്നത്..

പന്ത് ഗോളാകാതെ

വാണം പറക്കുംമ്പോൾ

കൂക്കും കൂയോ

അടി സിനിമ കാണുമ്പോ

കൊട്ടകയിലിരുന്നു

കൂക്കും കൂയോ

അല്ല കൂക്ക് എന്ന്

പിന്നീടും കോയ

തിരിച്ചറിഞ്ഞു ,

സിനിമകോട്ടകയിലെ

ടിക്കറ്റ് മുറി പണിക്കിടെ

എത്രയോ പേർ

അകത്തിരുന്നു

കൂക്കി ആർക്കുന്നു

മേഘരൂപമായി വെള്ള

തൊപ്പിയിലും തൂവൽ

താടിയിലും ബാപ്പ ആകാശത്തു

കൂക്കിനു മറു കൂക്കുമായി

കാതോർത്തു നിൽപ്പുണ്ട് എന്ന

ഉൾവിളിയിലും കോയ

ഇപ്പോൾ പാടത്തെ പാതയിലൂടെ

പോകുമ്പോൾ തല താഴ്ത്തി

നീങ്ങാറാണ് പതിവ്.

സ്വപ്നം ഇല്ലാത്ത ഒരുത്തന്റെ

സ്വപ്നത്തിലെ കൂക്ക്.

കൂയ്..

കൂ....

....... യ്യ്..

കൂ.............

ഒരു പ്രണയ പരാജിതൻടെ കുമ്പസാരം

  ഒരു പ്രണയ പരാജിതൻടെ കുമ്പസാരം 

ഭൂമുഖത്തെ എല്ലാം 

ചരാചരങ്ങളും 

പരസ്പരം ഗാഢ

 പ്രണയത്തിലാണ്..... 

എന്നെയും പിന്നെ 

നിന്നെയും പോലെ

 തന്നെ .

 പുറത്തേക്കും പിന്നെ 

അകത്തേക്കും 

 നോക്കുന്ന പ്രണയം 

പ്രണയം തരുന്ന 

ശൂന്യതയുടെ 

അലച്ചിലുകൾ ..

പ്രിയേ നീ നിൻടെ 

കണ്ണുകൾ എന്നിൽ നിന്ന് 

ഇത്തിരി മാറ്റി പിടിച്ചേക്കുക 

എനിക്ക് ഒരു പ്രണയ 

പ്രവാചകൻ ആകേണ്ടതുണ്ട് 

പ്രണയത്തെ പുകഴ്ത്തുന്ന 

നിൻടെ മനസ്സിലെ 

ഊഞ്ഞാലാട്ടങ്ങളിൽ നിന്ന് 

എന്നെ തെല്ലു പുറം തള്ളുക 

എനിക്ക് ശ്വസിക്കേണ്ടതുണ്ട് 

തിരിച്ചറിവുകൾക്കു ശേഷം 

നമുക്ക് സ്വാർത്ഥരാകേണ്ടതുണ് 

പിന്തിരിഞ്ഞു നടക്കേണ്ടതുണ്ട് 

-വേദനിക്കേണ്ടതുണ്ട് 

ദൈവമേ , ശരിക്കും 

പ്രണയിക്കാനുള്ള കഴിവ് 

എനിക്കില്ല എന്ന എൻടെ 

കുമ്പസാരം അങ്ങ് 

സ്വീകരിക്കേണമേ ...

അങ്ങ് ആണല്ലോ 

ഇതുവരെ ലോകം 

കണ്ടതിൽ വച്ച് 

ഏറ്റവും വിദഗ്‌ദനായ 

കാമുകൻ .

പിച്ചാത്തി

 പിച്ചാത്തി 

----------------------------------------------------------

തിളക്കവും മൂർച്ചയും ഉള്ള 

പിച്ചാത്തികളാലാണ് 

ഒരു നട്ടപ്പാതിരക്കായ് 

അവർ  കൊക്കി പ്പാറിയതും

 കൊത്തി അമർന്നതും 

വെട്ടി മാറിയതും- 

കുത്തിപ്പറിച്ചതും . 

അവരവൻടെ പള്ള കുത്തി 

കൊടൽ പിരിച്ചപ്പോളാണ് 

ഭൂഗോളത്തിൽ  ,എവിടെയോ 

ഉള്ള ഒരു ഗർഭപാത്രത്തിലെ 

ഒരു ചോരക്കുഞ്ഞു 

ആകാശം പിളർന്നു കരഞ്ഞത് ,

അവൻടെ നട്ടെല്ലിൽ നിന്ന് 

പിച്ചാത്തി വലിച്ചൂരി  

ചോരക്കുഴൽ ചീറ്റിച്ചപ്പോൾ 

ആണ് ഞാന്നു തൂങ്ങിയ 

മുലകളും ഒട്ടിയ വയറും 

ഉള്ള ഒരു മുത്തശ്ശിയുടെ 

ഭൂമിയിലെ ഏറ്റവും 

വലിയ നിഷ്കളങ്കതയിൽ 

ഒന്നായ കണ്ണുകൾ  ഘനീഭവിച്ചു 

ചോരവീർത്തതും - നട്ടെല്ല് 

വളഞ്ഞു കൂമ്പി തിരിഞ്ഞതും 

അവർ അവൻടെ തലച്ചോറ് 

കൊണ്ടു നിലത്തു ഒരു 

കറുത്ത ചോരപ്പൂക്കളം 

രചിക്കപ്പോളാണ് അതിലെ 

പൂക്കൾക്ക് അവരുടെ വീട്ടിലെ 

സുന്ദരികളായ സ്ത്രീകളുടെ 

 ആർത്തവ രക്തത്തിൻടെ 

ചൂര് പിടിച്ചതും  -രുചിച്ചതും  -

അവർ അവൻടെ കയ്യും 

കാലും വിരലും മൂക്കും 

നഖവും ചതച്ച ഇന്ദ്രിയവും 

മണ്ണിലേക്ക് കഷ്ണം വെട്ടി 

എറിഞ്ഞപ്പോളാണ് 

മണ്ണിലെ ഒരു  നീരുറവ 

നിലച്ചത്, നിലാവ് പിളർത്ത് 

 ഒരു കൂമ്പ് ഒടിഞ്ഞത് 

ഒരു മണ്ണിര നാലെണ്ണമായത് .

ഒരു കൊലപാതകം നടത്തി 

അവർ പിരിഞ്ഞു പോയപ്പോളാണ് 

കൊന്നയാളുടെ കയ്യും കാലും 

കണ്ണും കൊടലും കഴുത്തും 

തലയും ഉറുമ്പുകൾ 

ഒരു ജാഥ തീർത്തു 

ഒന്നിച്ചു ചേർത്തത് 

അങ്ങനെ അവൻടെ പല്ലുകൾ 

ഒന്നിപ്പിച്ചു തുന്നി ചേർത്തപ്പോൾ 

ആണ് അതിൽ ഒരിളിപ്പുണ്ടായത് 

തൊണ്ട തുന്നിയപ്പോൾ അതിൽ 

നിന്നൊരു ചെറു ഓളിയും 

അപ്പോൾ തന്നെയാണ് 

ഏതോ ഒരമ്മ സ്വന്തം 

മകനെ കുറിച്ചുള്ള  

ഒരു സുന്ദര സ്വപ്നം  കണ്ടതും 

അവർ കിടന്നിരുന്ന പായ 

അവരുടെ ഗർഭപാത്രത്തോടൊപ്പം 

ഒന്ന് തുടിച്ചതും 'കൈകൾ 

ഒരു താരട്ടീണം പിടിച്ചതും - 

ചുണ്ട് വിടർന്നതും ,

ഒരു കൊലപാതകത്തിൻടെ 

കഥ  അന്വേഷിച്ചാണ് 

അവർ പിച്ചാത്തി തിരഞ്ഞത് -

അത് ആയിരം ശവങ്ങൾക്കിടയിൽ 

സുരക്ഷിതനാകയാൽ ആയിരിക്കേണം 

അവർ അതിനെ കണ്ടില്ല എന്ന് 

രേഖപ്പെടുത്തിയേക്കാൻ പോകുന്നത് ,-

സ്കെച്ച്‌

 സ്കെച്ച്‌

--------------------------------------

മൂന്നാളുകളെ ആണ്

സ്കെച്ച് ചെയ്യേണ്ടത് .

ഒന്ന് ,

പിന്നിൽ വന്ന്

ഇരുമ്പവടി കൊണ്ട്

തലക്ക് അടിച്ചവനെ .

രണ്ട്

വാഹനമോടിച്ച്‌

അവരെ അവിടെക്ക്

എത്തിച്ചവനെ .

മൂന്ന്

കുടൽ പുറത്തു ചാടീട്ടും

രക്തം ചോർന്നിട്ടും

പിന്നെയുംപള്ളക്ക്

ആഞ്ഞു കുത്തി

എൻടെ മരണം

ഉറപ്പുവരുത്തിയവനെ.

ഉറക്കം

 ഉറക്കം

-------------------------------------

വീട് വളരെ വലിയതാണ് .

വീട്ടുകാരൻ ധനികനും .

ഉറക്കം വരാതെ കിടന്ന

രാത്രികളിൽ ഒന്നിലാണ്

വീട്ടുകാരൻ വാതിൽ

തുറന്നു പുറത്തിറങ്ങിയത് .

തെരുവിൽ കീറപ്പുതപ്പും

പുതച്ചു കെട്ടിപ്പിടിച്ചു

കൂർക്കം വലിച്ചു

സുഖമായി ഉറങ്ങും

പള്ള വീർത്ത

പതിനായിരങ്ങളെ

കണ്ടതും അന്നാണ് ....

പിറ്റേന്ന് മുതലാണ്

വീട്ടുകാരൻ രാത്രിയിൽ

വീട്ടു വാതിൽ തുറന്നു

തെരുവോരത്തെത്തി

സുഖമായി

ഉറങ്ങി തുടങ്ങിയത് ..

പിറ്റേന്ന് മുതൽക്കു തന്നെയാണ്

വീട്ടിലെ മദ്യകുപ്പികളും

മദിരാക്ഷിമാരും

ഉറക്ക ഗുളികകളും

ശീതീകരണ യന്ത്രവും

സ്വർണ്ണമെത്തയും

പാതി തുറന്ന വാതിലും

വീട്ടുകാരാനെ കാത്തു

രാത്രിയിൽ ഉറക്കമിളിപ്പ്

തുടങ്ങിയതും !

പ്രവാസി

 പ്രവാസി  

------------------------------------------

പിറന്ന നാടിനെ 

ഏറ്റവും സ്നേഹിക്കുന്നത് 

പ്രവാസി ആണ് .

അതാണല്ലോ അവൻ എപ്പോളും 

അകലെ ഇരുന്നു നാടിനെയും 

നാട്ടുകാരെയും പറ്റി ചിന്തിക്കുന്നത് .

-മരിച്ചു , ഒരു മാസം കഴിഞ്ഞാലും 

നാട്ടിൽ വിശ്രമിക്കാനായി 

ഒരു പൊതിയായി പറന്നിറങ്ങുന്നതും 

നാടിനെ ഏറ്റവും കൂടുതൽ 

വളർത്തുന്നതു പ്രവാസി ആണ് 

അതാണല്ലോ അവൻ ആര് 

സംഭാവന ചോദിച്ചാലും 

ഒരയ്യായിരം രൂപ 

എങ്കിലും കൊടുക്കുന്നത് 

അവൻ വിയർത്ത നാണയം 

പെരുപ്പിച്ചാണല്ലോ നാട് ഇത്ര 

വളർന്നതും 

നാട് ഏറ്റവും കൂടുതൽ 

വഞ്ചിക്കുന്നതു പ്രവാസിയെ ആണ് 

അതാണല്ലോ അവനെ നാട് 

സ്ഥിരമായി അവഗണിക്കുന്നത് 

- അവൻടെ സമ്പാദ്യം മറിച്ചു 

മറ്റുള്ളവർ സ്ഥിരമായി 

 .വളരുന്നതും .

 

ഒരു രാഷ്ട്രീയക്കാരൻടെ ചോര

 ഒരു രാഷ്ട്രീയക്കാരൻടെ ചോര  

----------------------------------------------

തലയറുത്തൊരു രൂപം 

മണ്ണിൽ കുറച്ചു കറുത്ത് 

കിടക്കുന്നു 

അരികേയായ്  നിറച്ചും 

ചോരവട്ടങ്ങൾ 

-അത് ഒരു :പാർട്ടി-

ക്കാരൻടെ ധീര 

രക്തസാക്ഷിത്വം .

അകലെയായ് മറ്റൊരു 

രൂപം തല ചിരിച്ചു 

കിടക്കുന്നു .

പള്ളക്ക് ചുറ്റിനും 

കൂടിയ കുടൽ മാലയിൽ 

നിന്ന് ചോര ചോർന്നു 

ചാലുകൾ തീർക്കുന്നു.

അത് മറ്റൊരു പാർട്ടി-

ക്കാരൻടെ  പാർട്ടി

ക്കായുള്ള ധീര മരണം .

ഇവരുടെ ചോര 

കൂട്ടിമുട്ടും വരെ മാത്രം 

ഇവരുടെ മൃത ശരീരം 

നീളുന്നു .

കൂട്ടിമുട്ടും മുമ്പേ 

അഥവാ അലിയും മുമ്പേ 

ഒന്നാമൻടെ ചോര 

രണ്ടാമൻടെ ചോരയോട് 

കുശലം ചോദിച്ചു .

നാം പാർട്ടിക്കായി 

സകലതും ത്യജിച്ചിട്ടും 

കൊടുത്തിട്ടും എല്ലാരും 

നമ്മുടെ പാർട്ടികളെ 

എപ്പോളും കുറ്റങ്ങൾ 

മാത്രം പറയുന്നതെന്തേ ?

നമ്മുടെ പാർട്ടിക്കാർ 

നാട്ടിനായി കാലങ്ങളായ് 

ചെയ്തൊരായിരം നല്ല 

കാര്യങ്ങളിലൊന്നുപോലും 

ആരും ഒന്നും പറയാത്തത് 

എന്തേ ?

അപ്പോളേക്കും ചിന്ത 

ഉണ്ടാക്കിയ ദുഖഭാരത്താൽ  

ചോരകൾ കനത്തു തുടങ്ങി ,

കാളക്കണ്ണ്

  കാളക്കണ്ണ് 

---------------------------

കയറിൻടെ ഒരറ്റം ഊരിയ കാള 

എന്തോ  തിരിച്ചറിഞ്ഞ മട്ടിൽ 

ആഞ്ഞു ദൂരേക്ക് പാഞ്ഞു 

 മടങ്ങിയ കൊമ്പുകൾ കുലുക്കി 

കഴുത്തിലെ കറുത്ത  മണികിലുക്കി 

ടാറിട്ട റോട്ടിലൂടെ   ടക്  ടക് ടക്  

സിവിൽ സ്റ്റേഷന്  മുമ്പിലൂടെ 

പോലീസ് സ്റ്റേഷന് മുമ്പിലൂടെ 

കോടതികെട്ടിടത്തിന് മുമ്പിലൂടെ 

പാർട്ടിയാപ്പീസിനു മുമ്പിലൂടെ 

പാഞ്ഞ കാളയെക്കാണാൻ 

ജനം ചിതറിയോടി 

അകലെയും മുകളിലും 

ആയി വരി പിടിച്ചു 

മദയാനയെ തളക്കും മട്ടിൽ 

ഇതിനിടക്ക്‌ ഇറച്ചികച്ചവടക്കാരൻ 

കാള ക്കയറിൻടെ ഒരറ്റം കൈക്കലാക്കി 

അടുത്തുള്ള തെങ്ങിൻചുവട്ടിൽ 

ചുരുട്ടിക്കെട്ടി 

കാള വിപ്ലവത്തിന് 

കാള  കോലാഹലത്തിന് 

 അസൗകര്യത്തിനു ,ഓട്ടത്തിനു 

അങ്ങനെ തിരശ്ശീലയായി .

കാള കാളക്കണ്ണിൽ കാര്യങ്ങൾ 

കണ്ടതാണത്രേ പ്രശ്നമായത് 

(മനുഷ്യനാകട്ടെ അവൻടെ കണ്ണിൽ 

കാര്യം കാണും ദയാലു മാത്രവും .)

ഡ്രാക്കുൾസ്സ്

 ഡ്രാക്കുൾസ്സ്

--------------------------

ഡ്രാക്കുള തിരഞ്ഞു നടക്കുന്നുണ്ട്

ഇന്നലെ പ്രണയം പറഞ്ഞ

സുന്ദരിയുടെ കണ്ണിലെ ചുവപ്പ്

ഇന്നലെ പത്തു പൈസ കൈയ്യിൽ

വച്ച് നീട്ടിയ ആളിൻടെ കൈവിരലിലെ

വലിയ നഖം

ഇന്നലെ കൂടെ യാത്ര ചെയ്ത

സുഹൃത്തിൻടെ ശരീരത്തിൽ

നിന്നും വന്ന ദുർഗന്ധം

ഇന്നലെ രാത്രി തലയ്ക്കു മുകളിലൂടെ

ചിറകടിച്ചു പറന്ന കടവാതിൽ

പാടത്തെ ചീവിടുകൾക്കൊപ്പം

ഓരിയിട്ട നായക്കൂട്ടം

അകലെ കാണുന്ന മലഞ്ചരിവിന്

മുകളിൽ കോട്ട കെട്ടിയ കാർമേഘം

മിന്നൽ പിണരിനൊപ്പം ചുരുണ്ടു

നിവരും കനത്ത മഴ

ഡ്രാക്കുള ഇവിടെ എവിടേയൊക്കെയോ

ഉണ്ട്

ഇപ്പോഴും -എപ്പോഴും

ഡ്രാക്കുള ഡ്രാക്കുള ആകാത്തവരെ

അന്വേഷിച്ചു അലയുന്നുണ്ട്

കുരിശന്വേഷിച്ചു ചെന്നപ്പോൾ

കണ്ട വൈദികൻടെ കൂർത്ത

പല്ലുകൾക്കിടയിലെ മാംസം

വായിച്ച വേദപുസ്തകത്തിന്നകത്തു

നിന്നും കേട്ട ചിരി മുഴക്കം

ഇനി ഡ്രാക്കുളയാകാതെ

മണ്ണിൽ കാലുകുത്താനാകുമെന്നു

തോന്നുന്നില്ല

പതിനായിരം കൊല്ലങ്ങൾക്കു

മുമ്പത്തെ ഡ്രാക്കുള

പതിനായിരം വർഷത്തിനുശേഷം

പതിനായിരം വർഷമപ്പുറത്തേക്കു

എടുത്തെറിയും മുമ്പുള്ള

മണ്ണിലെ ഒരു നിസ്സാര നിമിഷത്തിൻടെ

വില ?

ഡ്രാക്കുള തിരഞ്ഞു നടക്കുന്നുണ്ട്.......

കണ്ണ്

 കണ്ണ്

--------

അവൻടെ കണ്ണ് കാമക്കണ്ണാണ്

ഒരിക്കൽ അവൻ അവളെ

തുറിച്ചു നോക്കിയപ്പോളാണ്

അവളുടെ കണ്ണിൽ

പൊടിഞ്ഞ ജലവും

നെറ്റിയിലെ വിയർപ്പും

ശരീരമാകെ പായുന്ന രക്‌തവും

നാഡീവ്യൂഹവും

മൂത്രനാളിയും മലവും

അവ ൻടെ കണ്ണിൽ പെട്ടത്.

അവളുടെ മാറിടത്തിലെ വ്രണങ്ങളും

വീട്ടിലെ പട്ടിണിയും

രാത്രികളിലെ ഉറക്കമില്ലായ്മയും

കുട്ടികളോട് അവൾക്കുള്ള    

ത്യാഗവും പിന്നെ

അവൻടെ  കണ്ണിലേക്കായി എത്തി.

അരികിലുള്ള ഒരു കമ്പെടുത്തു

അവൻ അവൻടെ  കാമക്കണ്ണു -

കുത്തി പൊട്ടിച്ചു...

ശബ്ദം

 ശബ്ദം 

----------------------------------------------------

പ്രപഞ്ചം നിശ്ശബ്ദം 

സത്യം -നിശ്ശബ്ദം
സുന്ദരം .


എന്നാലും -

പ്രസവ മുറികളിലും  
മരണ മുറികളിലും  
അടിമ മുറികളിലും 
അറവു ശാലകളിലും 

ഒക്കെയായി -ശബ്‍ദങ്ങൾ 

പട്ടിണിയിലും 
സമരമുഖത്തും 
-ശ്ശബ്‌ദം 

പ്രണയത്തിൽപ്പോലും ശബ്ദം?

ധ്യാനം

 ധ്യാനം 

-----------------------------------------------

ഞാൻ പുറത്തു പോയി.

ഇനി ഞാൻ  വരില്ല -

താൽക്കാലികമായി പോലും !

മൊബൈൽ ഫോൺ

 മൊബൈൽ ഫോൺ

----------------

യുവതി അവളുടെ ഇഷ്ടം

പറഞ്ഞപ്പോൾ

അയാൾ മൊബൈൽ ഫോണിനെ

കെട്ടിപ്പിടിച്ചു ചുംബിച്ചു.

യുവതി മറ്റാരോടോ രാത്രി

നിറുത്താതെ സംസാരിക്കുന്നതു

കണ്ടപ്പോൾ അയാൾ മൊബൈൽ

ഫോണിനെ വെറുത്തു.

യുവതി മദ്യപാനം നിറുത്താത്തതിന്

പുളിച്ച തെറി പറഞ്ഞപ്പോൾ

അയാൾ മൊബൈൽ ഫോൺ

നിലത്തിട്ടു ചവുട്ടി പൊട്ടിച്ചു.

അവിശ്വാസി

 അവിശ്വാസി 

========================

അവന് ആദ്യം 

ദൈവത്തെക്കുറിച്ചു 

ഒന്നും അറിയില്ലായിരുന്നു 

പിന്നീട് അവൻടെ 

ദൈവത്തിലേക്ക്  

അവൻ കലന്നു .

ബ്ളയിൻഡ് ലൗ

 ബ്ളയിൻഡ് ലൗ 

===================

കാമുകൻ പൊണ്ണത്തടിയനാണ് 

കാമുകൻ  മദ്യപാനിയും 

താന്തോന്നിയും അലഞ്ഞു 

നടക്കുന്നവനും കൂടി ആണ് .

കാമുകി സുന്ദരി ആണ് 

കാമുകി  ബുദ്ധിമതിയും 

സൽസ്വഭാവിയും ധനികയും 

അന്യ മതസ്ഥയും കൂടി ആണ് 

"സൊ വാട്ട് ?" 

എന്നാണ് കാമുകൻടെ

 സ്വഭാവത്തെ കുറിച്ചു 

കാമുകി അഭിപ്രായപ്പെട്ടത് 

"ഐ ലൗ ഹിം ",

 എന്ന്അവൾക്കു

പതിനെട്ടു തികഞ്ഞ അന്ന് 

നടന്ന അവരുടെ രജിസ്റ്റർ 

വിവാഹത്തെക്കുറിച്ചു

ചോദിച്ചപ്പോളും !

ഒന്നാമൻ

 ഒന്നാമൻ 

===================

ഒന്നാമനായാണ്

എല്ലാ പരീക്ഷയും 

അവൻ വി ജയിച്ചത് 

ഐ എ എസ്സ് പരീക്ഷ 

ഒന്നാം റാങ്കിൽ വിജയിച്ച 

അന്ന് വൈകുന്നേരം 

തന്നെ ആണ്  അവൻ 

പാമ്പ് കടി ഏറ്റു  

മരിച്ചതും 

(അങ്ങനെയാണ് 

ഐ എ ഏസ് പരീക്ഷ 

ഒന്നാം റാങ്കിൽ പാസ്സായ

 അന്ന് തന്നെ പാമ്പ് 

കടി എറ്റു  മരിച്ച 

ഒന്നാമനായി അവൻ 

മാറിയതും. ).

ഇൻലൻഡ്

 ഇൻലൻഡ് 

----------------------------------------

പണ്ട് ,

 ഉച്ചക്ക് പതിനൊന്നരക്കാണല്ലോ 

പിറകിൽ ഒരു കുടയും ഞാത്തി

 പ്രണയത്തിൻടെ ഇൻലൻഡുമായി 

പോസ്റ്റുമാൻ വീട്ടുപടി കയറി 

വന്നിരുന്നത്. 

കാത്തിരിപ്പിൻടേയും ആകാംക്ഷയുടെയും 

സുഗന്ധം ആവോളം പരത്തിയിരുന്ന 

ഇൻലൻറ്റിനു അവളുടെ 

ഹൃദയത്തിൻടെ മണമായിരുന്നു 

അവളുടെ പുകഴ്ത്തലുകളുടെ 

 കൗതുകകങ്ങളുടെ  കരുതലിൻടെ 

വലിപ്പമായിരുന്നു 

അവളുടെ ചിറകിന്നടിയിലെ 

ചൂടായിരുന്നു .

അതിലെ അക്ഷരങ്ങൾക്ക് 

അവളുടെ കൺ വലുപ്പവും 

തുടിപ്പും ആയിരുന്നു 

ഇന്ന് 

അവൾ എവിടെയാണ് ?

അഥവാ മരിക്കുന്നതിന് 

തൊട്ടു മുമ്പത്തെ അവളിലെ 

ഞാൻ എന്താണ് ?

എൻ്ടെ പ്രണയം കുടികൊള്ളും  

അവളുടെ ശവശരീരത്തിലെ 

ചീയാത്ത  ഭാഗം ഏത് ശവ 

കുടീരത്തിന്നകത്താണ് ?

അവളിലെ ശ്വാസം അറ്റത് 

ഏത് രാജ്യത്തിലെ മെട്രോപൊളിറ്റൻ 

 സിറ്റിയിലെ ശീതികരിച്ച ഫ്ലാറ്റിൽ 

വച്ചാണ് ?

രാത്രിയിലെ ഏതു യാമത്തിലാണ് ?

അവളെ അറിയാൻ വീട്ടിലെ 

തട്ടിൻപുറത്തെ 

പഴയ സാധനങ്ങൾക്കൊപ്പം 

ഉള്ള മരപ്പെട്ടിയിലെ പാതി കീറിയ 

 പഴയ ഇൻലൻടിൽ തപ്പേണം 

ബാക്കി പതിക്കായി മനസ്സിലെ 

ചില നിഴലോരങ്ങളിലും ഇളം 

തണപ്പുകളിലും 

അവസാനങ്ങൾ ഇല്ലാത്ത 

പ്രണയങ്ങൾ ഇല്ല എന്നാണല്ലോ 

മുപ്പതു വർഷ ങ്ങൾക്കു  

മുമ്പേ അവൾക്കായി അവസാനം 

അയച്ച ഇൻലൻടിൽ 

അറിയാതെ എഴുതിയത് ..

പാഠം -3 ആമ ജയിക്കുമ്പോൾ ....

 പാഠം -3  ആമ ജയിക്കുമ്പോൾ ....

-----------------------------------------------

പതുക്കെ ഓടുന്ന മത്സരത്തിലും 

കൂടുതൽ കാലം ജീവിക്കുന്ന മത്സരത്തിലും

എല്ലാം ഉള്ളിലൊതുക്കുന്ന  മത്സരത്തിലും

 ആമ മുയലിനേക്കാൾ എത്രയോ മുന്നിലാണ് .

കനമുള്ള പുറന്തോട് മുയലിനില്ല .

കരയിലും വെള്ളത്തിലും കൂടി ഉള്ള 

ഇനങ്ങളിൽ മുയൽ പങ്കെടുക്കാറുമില്ല 

അല്ലെങ്കിലും ,എന്ന്, ഏതു മത്സരത്തിലാണ് 

മുയൽ ആമയെ തോൽപ്പിച്ചിട്ടുള്ളത് ?

അഥവാ മുയൽ ആമ ആയിട്ടുള്ളത് !

ചിത്രശലഭങ്ങളോടൊപ്പം ഒറ്റയ്ക്ക് ....

ചിത്രശലഭങ്ങളോടൊപ്പം

ഒറ്റയ്ക്ക് ....

(ഒറ്റപ്പെട്ട ഒരു യാത്രയുടെ

വേണ്ടാത്ത ഒരപൂർണ്ണ

ഓർമ്മ കുറിപ്പ് )

ചിലർ അങ്ങനെയാണ് .

ഒറ്റയ്ക്ക് നടക്കുന്നവർ

ഒരു പാർട്ടിയിലും

ഒരു ഫോട്ടോയിലും

ഒരു റാങ്ക് ലിസ്റ്റിലും

ഉൾപെടാത്തവർ

ഒരു കമ്മ്യൂണിറ്റി

സദ്യയും ഉണ്ണാത്തവർ

രാത്രിയും പകലും അവർ

ഒറ്റയ്ക്ക് ഉറങ്ങാതിരിക്കുന്നു

ഒറ്റയ്ക്ക് മഴ നനയുന്നു

ഒറ്റയ്ക്ക് ചിന്തിക്കുന്നു

ഒറ്റക്ക് നടന്നു നീങ്ങുന്നു

പ്രവർത്തനത്തിൻടെ വലിയ

ഇല മറഞ്ഞ ഒറ്റയടിപ്പാത

തീർക്കുന്നു -

മുമ്പോട്ടോ പിന്നോട്ടോ

മേലോട്ടോ നോക്കാതെ

കാല്പാദങ്ങളുടെ അളവുകളിലൂടെ

അവർ നിഴലുകളോ ചവുട്ടടിയോ

ഇല്ലാതെ നടന്നകലുന്നു

പ്രണയത്തിൽ നിന്നും

സ്വാർത്ഥത ഊറ്റി എടുത്തവർ

ദുഃഖത്തെ സ്വന്തത്തിൽ നിന്നും

കടഞ്ഞെടുത്തവർ

പണത്തെ പൂമ്പാറ്റയാക്കിയവർ

അറിവുകൾ അറിവല്ലാത്തവർ

കണ്ണാടിയിൽ നോക്കാൻ വണ്ണം

മുഖം ഇല്ലാത്തവർ

അവർ - ഒരു പക്ഷെ

ഒരന്ധനോ ബധിരനോ

മുന്നിൽ മുട്ടുകുത്തി ഒന്ന്

കരഞ്ഞേക്കും

ഒരു പക്ഷെ വിശപ്പിന്നു

എതിരെ

ദൈവത്തിനുനേരെ

തോക്കെടുത്തേക്കും

ഗതികേടിൻടെ മുറിവുകൾ

സ്വയം പേറാൻ

തോളു നീട്ടിയേക്കും

അനാഥാലയങ്ങളിലോ

അശരണ കേന്ദ്രങ്ങളിലോ

അടുക്കളകളിൽ അവർ

പ്രപഞ്ച സത്യം ഭക്ഷണ

രൂപത്തിൽ നിത്യവും

ഉണ്ടാക്കുന്നവർ

നിലാവിനെ നോക്കാതെ

തിരയെ മലയെ പുഴയെ

കാണാതെ വെറുതെ നടന്നു

അകലുന്നവർ

ജീവിക്കാൻ ജീവൻ

വേണ്ടാത്തവർ

ജീവിച്ചിരിക്കെ

എന്നന്നേക്കുമായി

കാണാതാകുന്നവർ

ലളിത സത്യങ്ങളിൽ

വേദാന്തം കണ്ടവർ

അവർ

ഒരു പക്ഷെ ഒരു കാടു മുഴുവൻ

ഒറ്റയ്ക്ക് നടന്നു കയറിയേക്കും

ഒരു കടൽ മുഴുവൻ ഒറ്റയ്ക്ക്തു

തുഴഞ്ഞു കടന്നേക്കും

ശാന്തമായ ഒരു ചിരിയോടെ

ഒരു പ്രകൃതി ദുരന്തം മുഴുവൻ

ഒറ്റയ്ക്ക് താങ്ങിയേക്കും

ആകാശം നോക്കി മണ്ണിലൂടെ

പറന്നേക്കും .

സ്വന്തം പണിയായുങ്ങളിൽ

മാത്രം വിശ്വസിച്ചേക്കും

(പ്രദീപ് എൻ വി )